Kako postati pravi jedriličar
Svitu moj, od mora i kraja, svi vi ča bi htili biti pravi jedriličari, nema van druge nego poslušati ča van ima reći onaj ča je svoj zanat ispeko, ča oće reći mene na primjer, Šimu Pitura.
Ima onih judi ča se rodu u jedrilicama. Čin su in prvi zubi izašli već su ih upisali u Klub, a sa dvi-tri godine su bili bar na Barcolani, ako već nisu bili okolo svita, bar dva-tri đira. E, to su, rečimo na primjer, oni judi ča vridu, jedriličari od kolina.
To da je njima već pokojni did bi jedriličar na Olimpijadi kod Hitlera, to van je isto kjaro ka sunce u burni dan.
Jasno van je i to da ih je u peleni u jedrilicu hiti njihov pape, a ni mati in nije bila daleko, iako je ona pura vlajna iza brda i more je ni baš po volji, ma, ča će, bolje je da je ona na brodu nego neka kurbetina uz muža joj floćuna.
Tako van to gre, svitu moj. Jedrilica se dobije od dida, Pape je proda i kupi dvi postole dužu i postolu širu, i to onaj model od plastike, ča ima školjku od kunduta i pećicu na plin, da lipo moreš skuvati obed kad te ćapa gladuša.
Kad dojde red na tebe, nema ti druge nego učiniti veli trošak i izvaditi devize ča si ih stavija ispod armeruna za učiniti kuću na tri kata.
Čin si na sajmu u onon Beogradu na moru vidija kakove su cine bilo ti je jasno da će kuća imati bar kat manje. Svragon i kuća, ionako ste ti i žena skoro uvik sami u njoj, dica su pošla svojin puten i ča će van više soba za luštrati cakla i glancati parketi.
Eto, znači i to smo uredili.. šoldi su parićani, jedrilica se našla, i sad triba urediti ono ča je najgore.
Svitu moj, jeste li vi vidili koliko u ovin našen kraju ima brodova. Kad su svi našli di će se vezati, valjda će se i za vaš novi ponos i imovinu o plastike najti koji bokunić rive oli marine.
I .. onda, vi onakvi kakvi ste, malo plesnuti, odete pitati u marinu da koliko je cina za zavezati brodić na godinu. Untiii irudaaaaa!!!
Ako vas onda nije udrila kap u srce i ona druga u mozak, nikada i neće..
Posli razgovora su van tri ure davali umjetno disanje, masažu o srca i onu infužiju u žilu. Jedva su vas škapulali!
Osan ijad, osan ijad euri za godinu! Plus pedeve ! Osan ih kuxxxov jxxxxo!
Za onaj gnjili konop i po metra rive! I to, da se morate upisati u red, i da će van poslati unaj emajl kad se učini misto za imovinu.
Posli toga ste pošli u onu firmu ča je ka gradska, oli od županije, ko će ga znati sada, sve je to isto, ka da ih je isti ćača učinija, svi imaju isti mot i isto govore.
Da triba učiniti zahtjev, govore one meni, kad se u Narodne novine na inkternetu napiše da je natječaj za ti vrazi od veza, i da tribaš biti atento kako bi prvi sa preporučenon pošton posla zahtjev za oti vez, i da će oni zaprimiti onaj ča se prvi pošalje, i ako na pečatu pošte bude pisalo da si ti prvi, onda će tebi dati vez. Prije toga tribaš ispuniti upitnik na osan stranic, kupiti taksene marke i u pošti učiniti uplatnicu na 8 eura i 30 centi, za trošak pošte.
Aaaa, kad bi moga biti, taj vaš natječaj?
Da mi ne moru reći, jerbo da bi to povridilo slobodu tržišnog natjecanja i jednakost svih u natječaj..
Mene su našli! Ko da ja ne vidin odokle ovaj vitar puše. Nis ni ja baš toliko plesnut da ne vidin da od ovog boga županijskog neće biti ništa, a ni ovi građani mi baš nisu nešto.
Nema meni druge nego pojti u Klub, učlaniti se i postati prvorazredni jedriličar od kolina. Nemo veze ča mi je did jedrija samo na gajeti kad su se vraćali iz polja, nema veze ča mi pape nikad nije ima ni sandolinu a kamoli jedrilicu, triba se najti neki napredni, ka ča san, rečimo na primjer ja, i kupiti tu vražju jedrilicu od plastike.
Kad si doša u Klub, rekli su ti da je koje su ti kompletencije, da jesi li idri na Olimpijadi joli na Svickon kupu o jedrenja u zadnjih 8 godin. Jer, da ko nisi materijal od te vrste, da moraš učiniti zahtjev na odbor, i unda će oni tebe dobro promotrit i viditi jesi li ti materijal da budeš član kluba oli ne..
I da bi bilo dobro i od koristi da ti neki ča je bi na olimpijadu napiše niko pismo, ka preporuku, da si ti drug i starešina, i da ti je skoro pa jasno di je krma a di prova i te neke lipe stvari.
Majketi,mislin u sebi, ka da ovi sa olimpijadama restu okolo ka zelena salata u babe mi.
Za jednu, pet šest miseci, ovi glavešine u Klubu će se naći na pivu, pogledati će sve ča si nakiti, sve te lipe preporuke, i onda će te, ko bog da, primiti u Klub.
Za prvu ruku, jedno, dvi-tri godinice ćeš biti ka pripravnik, posli kad oni vide da si ti karakter i čovik na svon mistu, primiti će te ka svoga.
Kako je i red, ti ćeš onda hoditi okolo i častiti svakoga ko ti se učini da je od nekog položaja u Klubu, jer tako i triba. Prije toga, a dok si još uvik pripravnik, tvoje je da si svaki dan u Klubu, da vidiš ima li koga, da se javiš onima ča ih poznivaš i onima ča nemaju pojma koji su, da si se nacrta na svaku regatu, da čekaš ko će te ukrcati na brod i otrpiti malo te tvoje munještine i to ča svaki put iz prve nisi sigur jel naprid prova ili se nekako drugačije to zove.
A ne boj se, biti će toga još, laškaj brac, karikabaso ti je prekacan, dric po provi, kacaj karocu, molaj štraj, laško gindac, kalaj špin, gori drifter, nisi ga ni dovuka gori, opet neka manovra za doli, digni genaker, gori, doli, livo desno, sve dok ti se ne sve lipo ne pomiša i dok ne budeš više zna kako se zoveš.
Kad te iskrcaju na rivi o kluba, učiniti će ti se da si proša centrifugu na ijadu.. i ništa ti više neće biti jasno, ni ko si , ni kako se zoveš, ni koga vraga imaš s tim munjelama ča se samo deru na svoje i na ove druge, samo nešto dižu i skalivaju, ne moru stati u miru ni minutu a da neki konop ne triba natezati joli laškivati..
Cijelin puten će ti u glavi biti tvoj lipi talijanski kauč od kože ča ga je žena kupila sakreto a da ti ni rekla koliko košta, i kako bi ti moglo biti lipo da se nisi ukrca na tu vražju jadrilicu i da si sta doma, ka i svi drugi normalni judi ki nemaju potribu biti članovi o Kluba jedrilic i onih ča se tako osićaju .
Ma najgore od svega na svitu je da ćeš čin ti daju da nešto poiš i popiješ opet dojti u taj paka i opet učiniti prijavu za onu drugu regatu ča je na redu za misec dan.
Kako to lipo piše u izvještaju o policijoti: “ Osumljičeni je samoinicijativno pristupio skupini sportskih rekreativaca, usprkos višestrukim i opetovanim upozorenjima nazočnih, aktivno sudjelovao u beskorisnim kretanjima te time počinio značajnu materijalnu i nematerijalnu štetu na vlastiti trošak. Sam pao, sam se ubio!“
Jašta!
